كيكة عادية
هاد الكيكة دازت هذا الاسبوع في اللقاء المفتوح . هي كيكة عادية من حيث المقادير و لكن الجديد فيها هو انها كتخدم كلها في الخلاط الكهربائي و كتدخل للفران و هو بارد و النتيجة نخليكم تكتاشفوها من خلال الصور
اولا نبداو بالمقادير و الطريقة كما قالتهم صاحبة الوصفة
4 بيضات
كاس عنبة ماعامرش زيت
كاس عنبة ماعامرش سنيدة
كاس و نصف عنبة فورص ممتاز
2 خمارات
التزيين
2 حكاك دانون فاني
2 طريفات شكلاط اسود محكوك
الطريقة
نديرو البيض في الخلاط الكهربائي ثم سنيدة و نخلطو مزيان حتى يرغوي الخليط ثم نزولو الغطاء الصغير اللي الفوق و نبقاو نزيدو الزيت مع التخلاط ثم نكبو الدقيق مخلط مع الخمارة و نخلطو مزيان ثم نكبو الخليط في مول مدهون بالزبدة و مرشوش بالطحين (و نضربو المول فوق البوطاجي باش يزول فائض الدقيق) و منين نكبو الخليط فالمول نهزو يدينا الفوق باش يدخل معاه الهواء و تجي الكيكة منفوخة
ندخلو المول للفران و هو بارد عاد نشعلوه و نخليو الكيكة تطيب و تتحمر و منين نخرجوها مباشرة من الفران نكبو عليها دانون و نسرحوه عليها مزيان و نخليوها حتى تبرد عاد نزينوها بالشكلاط محكوك او فيرميسال
بما ان الكيكة ما فيها حتى منسم من الاحسن ننسموها بشوية من قشور الليمون او الحامض محكوكين انا نسمتها بالفاني
و الان نخليكم مع التطبيق ديالي بالصور
[ندعوك للتسجيل في المنتدى أو التعريف بنفسك لمعاينة هذه الصورة] [ندعوك للتسجيل في المنتدى أو التعريف بنفسك لمعاينة هذه الصورة]راها غير كيكة بمقادير عادية و لكن كتجي خفيفة بزاف و هشيشة خصنا غير نتبعو المراحل مزيان
بالصحة و الراحة
