هدي نصائح بعض الاخوات ...
احسن حاجة لتسيير المصروف بشكل جيد
هي تعملي جدول لكل الحاجات للي كتشريها للاستهلاك العائلي الشهري
اما جدول ورقة و ستيلو او ديري جدول إكسل فالكمبيوتر ديالك
و تكتبي فيه كلشي بالتفصيل من اللحم للزيت للخضار للمنظفات للملابس للكوش للدواء للفواتير (ماء كهرباء تيليفون بنزين ...) ... يعني كلشي للي كتحتاجي انتي و اهل بيتك
و بعدها كتعزلي غير الضروريات من هاد الجدول
و كتجمعي الحساب ديالها باش كتعرفي شحال كتصرفي فيها شهريا بالتمام
و كتعرفي الحاجات الباقية الكمالية شحال كتدي ليك كل شهر
و كتولي تعرفي الحاجات للي كتشريها كل شهر
و الحاجات للي غتشريها مرة كل شهرين او مرة كل 6 شهور او حتى سنة
هكا كيبان ليك فلوسك فين كيمشيو و كتعرفي شحال المبلغ التقريبي الشهري القار للي معندك علي لاين من صرفو
و المبلغ للي ممكن توفري و تقتاصدي فيه
الاخوات للي كيقولو انهم الى مشاو للاسواق الممتازة كيخسرو بزاف و كيضيعو فلوسهم
فهذا كيبقى اختيار للشخص لو ملتزمتيش بليستة و فكرة معينة فالشراء غتخسري الفلوس فينما تقديتي
الى للي بنات ليك كتهزيها بلا متاخذي بعين الاعتبار حاجتك ليها و استعملاك ليها و ثمنها ايضا
التقدية كتبقى كيف كيف سواء ا عند الحانون او الهري او الاسواق الممتازة
غير كيكون الفرق فالاثمنة و ديك 1 درهم زايدة او ناقصة راها كدير الفرق لما كيتجمع الحساب
شخصيا كنفضل نتقدى فالاسواق الممتازة او الڭرو بدل منبقى غادة جاية للحانوت
كنحدد مبلغ معين شهري قار للمونة المنزلية مكنفوتوش والا كنزيد عليه حتى لو كانو الضياف
قبل منمشي نتقدى كنشوف العروض الموفرة و التخفيضات و ندير مقارنة و نكتب الليستة ديال الحاجات للي غناخذ لهاد الشهر بالذات
و كنلتزام بيها باش منولف زيد الماء زيد الدقيق
بالنسبة للمونة ديال الدار
فكنتقدى حسب العرض و التخفيضات
يعني الى بانت لي شي حاجة فيها عرض مغري داكشي ديال 2 بثمن واحد او شري 2 و 3 مجانا
و طبعا لما كيكونو تخفيضات ديال 50% فالحاجة مكنزڭلهاش الى كنت غنحتاجها طبعا
المونة الاساسية المعروفة بحال الدقيق و الزيت و السكر و اتاي و القهوة و الحليب كناخذ للي يكفيني شهر الى 2 شهور
مثلا 5 كيلو دقيق و 5 كيلو حرش و 5 كيلو شعير كتديني 3 شهور يعني كنشري كل شهر خنشة من نوع معين و هكا ديما الدقيق موجود فالدار
ايضا الزيت كنشري القرعة ديال 2 ليتر كل 2 شهور حيت مكنستهلكش الزيت الرومية بزاف 1 ليتر كيكفيني فالشر و يشيط
اتاي علبة ديال 250 غرام كنستهلكها شهريا لما كتكو فيه البروموسيون راه كناخذ بزايد و نقسمو على الشهور
الحليب كناخذ البودة الساشي باش ديما كيكون عندي موجود فالدار ديال 14 ليتر كيديلي شهر و الزيادة
مرة مرة كناخذ حليب العبار البلدي لما كيكون متوفر
السكر كناخذ الساشي ديال 2 كيلو سنيدة كل شهر كاين فاش كيديلي شهر و الزيادة حسب واش عملت الحلويات بزيادة او لا
القهوة كناخذ قريعة قهوة سريعة الذوبان و علبة قهوة مطحونة ديال 250 غرام كيبقاو عندي اكثر من شهرين حيت كنستهلكو اتاي و ليتيزان اكثر من القهوة
الخضار و اللحم كنتقداها اما كل اسبوع او كل 15 يوم حسب الموسم
يعني اما كنتقدا 4 مرات فالشهر او 2 مرات فالشهر
خضار فواكه اعشاب لحوم (عجل/دواجن/اسماك/بيض)
زيت الزيتون و زيت ارڭان كناخذها فموسمها 5 ليترات كنحفظها فالثلاجة و كتديني مدة طويلة ممكن تكمل عندي السنة
المعجنات (روز/سپاڭيتي/كوكوييت/لازانيي/كانولي/تورساد/پين/شعرية/ سفة/كسكس/بلبولة...) ايضا لما كتكون بروموسيون كناخذها بزايد و نتهنا من شراءها للشهور المقبلة
الخميرة ديال الخبز كناخذ فيها العلبة ديال الخميرة اليابسة كتبقى عندي شهر و الزيادة
و الخميرة ديال الحلويات كناخذ فيها العلبة الكبيرة ديال 900 غرام كدوز عندي سنة
لوازم الحلويات و النكهات ايضا كناخذها وقت البروموسيون او عند الڭرو كناخذ للي يكفيني 6 شهور الى سنة
بالنسبة للفواكه الجافة كناخذها ايضا للكيلو ،
عند الڭرو كتقام ارخص و كدوز عندي شهور لو حفظت مزيان فالثلاجة
و كنفضل تكون عندي حيت معروف منافعها خصوصا للوليدات احسن من الفانيد و الحلويات
المهم بشكل عام كلشي كيكون محدد ليه مبلغ معين كل شهر الى كمل المبلغ مكنشريش الحاجة كندير بالناقص نعطيكم مثل :
مثلا اليوغورت و مشتقات الحليب من زبدة و كريم و لبن و فرماج و اجبان ...
كنحدد ليها مبلغ 100 درهم فالشهر مثلا الى موفرتش من هاد المبلغ مكنزيدش عليه ،
لانها كتبقى كماليات غير الى ولفتيها كتبان ليك حاجة مهمة فحين انها ماشين ضرورية ممك تعوضيها بكل سهولة
و عليها ممكن نوزنو حاجات كثيرة كنشريوها و نضيعو فيها ميزانية فحين انها ماشي ضرورية
