اختي واش كتقصدي سلو؟؟؟
يلا كان سلو هو السفوف انا كنديرو بطريقة تقريبا مغايرة
كنحمر الطحين على نار مهيلة حتى كيولي بني نوعا ما
و كنضيف ليه االقوام بلا ميزان عيني ميزاني
مثلا كيلو ديال الطحين كنظيف ليه نصف كيلو الزنجلان محمر قليلا
و شوي ديال المسكة الحرة يعني راص ديال السكين
ثم 2 معالق كبار ديال النافع مغسول و محمر قليلا
و شوي ديال القرفة تقريبا معلقة كبيرة
ربع معلقة صغيرة ديال الملحة
و نعملو فالطحانة يتطحن و لي فالمغرب تعمل هذ المقادير و تديه لعند الحانوت لي كيطحن اللوز و يصحنو لها بحال اللوز ديال العقدة
و من بعد كناخد قيمة
كيلو و نصف حتى لجوج كيلو ديال اللوز مصلوق و مزولو القشرة
و محمر و هرمشو كنضيف للمقدير الاولى باش كيبان بان سلو فيه ليقامة مزيانة
ثم كنضيف ليه الزيت البلدية على حساب واش كيتقبل الجسم ديالي
و في الاخير كندير ليه العسل الحرة
و لي ما عندهاش العسل الحرة تعمل السكر الكلاصي حسب الرغبة ديالها
ملاحظة
انا منين كندير سلو ما كنخلطوش كامل
كنخلط الا كمية لعدد من الايام و الباقي كنديرو فالفريكو و فوقما بغيت سلو كنخرج المكونات و نخلط
و هكذا دائما سلو جديد بلا داك النغمة ديال الزيت
و بالصحة و الراحة
و نتمنى الاخوات يدخلو و ينقدو الموقف و يعطيوك وصفة كاملة ان شاء الله
