السلام عليكم البنات لاباس عليكوم ...اليوم جبت ليكوم مقادير وطريقة خبيزات مقليين في الزيت ..اللي كلاهوم عندي كيحماق عليهوم شكار راسوو ههههه..وبيني وبينكوم انا موالفة كنديرهوم بلا مقادير ولكني ضبطتهوم باش نشارككوم الوصفة لانه فعلا خبيزات لداد ايوا باراكا عليا من الهضرة وندوز للمقادير;
600غ دقيق فورص
50غ زبدة
2 معالق كبار سنيدة
20غ خميرة دالعجين
ملعقة صغيرة ملح
بيضة
300ملل حليب للعجين
كنعجنو المقادير وكندلكو العجين مزيان حتى نحصل على عجين رطب
كنخليوه يرتاح شوية ومن بعد نعملو منو كويرات نخليوهوم عاود يرتاحو غير شوية باش يسهال علينا التقراص ...ومن بعد نخليوهوم يخمرو جهد نص ساعة المهم ماشي مزيان تفوت فيهوم الخميرة حينت كيتشققو وماكيتنفخوش فالطياب ...صافي نديرو شوية دالزيت فالمقلة ونبداو نطيبو ولكن غير نرميوها نقلبوها دغيا على الجهة الاخرى هاكاك كيتنفخ وكيجي زوين وراه ماتخافوش من الزيت كيجي ناشف من الداخل نخليكوم مع الصور
[ندعوك للتسجيل في المنتدى أو التعريف بنفسك لمعاينة هذه الصورة]والاولى فيكوم وجدت ليها هاد الطبسيل مع الزبدة دايبة والعسل وطاس دالقهوة مرحبا
[ندعوك للتسجيل في المنتدى أو التعريف بنفسك لمعاينة هذه الصورة]كنتمنى يعجبكوم وتجربوه وماتنساونيش من دعواتكوم
